Starfshættir jarðvarmahóps

Á undanförnum árum hafa þrír vinnuhópar starfað undir okuspárnefnd, raforkuhópur, jarðvarmahópur og eldsneytishópur. Hlutverk jarðvarmahóps hefur verið að undirbúa jarðvarmaspár og afla nauðsynlegra grunngagna um jarðvarmanotkun sem spárnar byggjast á. Gagnaöflunin hefur að stórum hluta verið unnin í samvinnu við Orkustofnun og einnig Samorku. Eftir u.þ.b. eins árs hlé, sem skapaðist af breytingum á skipan raforkumála hér á landi, hefur nú verið skipuð ný orkuspárnefnd og verið er að endurskipuleggja starf undirhópa hennar, en þeir verða áfram þrír eins og verið hefur. Lagt er til að starfsemi jarðvarmahóps verði í framtíðinni með líku sniði og verið hefur og að helstu verkefni hans verði eins og lýst er hér að neðan.

Tilgangur með gerð jarðvarmaspár

Í lögum um Orkustofnun er kveðið á um að stofnunin safni gögnum um orkulindir og orkubúskap landsmanna og vinni að áætlanagerð til langs tíma um hagnýtingu orkulindanna. Í reglugerð er þetta nánar útfært og m.a. sagt að eitt af verkefnum Orkustofnunar sé gerð orkuspáa. Þetta er í sjálfu sér nægileg ástæða fyrir stofnunina til að vinna jarðvarmaspá þótt umfang mannafla og fjár sem sett er í spána hljóti að fara eftir mati á mikilvægi hennar á hverjum tíma. Gildi jarðvarmaspár felst m.a. í eftirfarandi:

• Almennt upplýsingagildi, bæði fyrir stjórnvöld og almenning.
• Nýtist stjórnvöldum við stefnumótun í orkumálum.
• Gildi fyrir einstök orkufyrirtæki í tengslum við áætlanagerð.
• Gildi fyrir iðnað sem tengist jarðhitamálum eða vinnur á sviði jarðhita.

Gagnasöfnun

Ein af forsendunum fyrir góðri jarðvarmaspá er að fyrir liggi nýjustu og bestu upplýsingar um notkun jarðvarma í landinu á þeim tíma sem spáin er gerð og jafnframt hver þróunin hefur verið innan einstakra notkunarflokka. Orkustofnun er ábyrg fyrir gagnasöfnun af þessu tagi, en mörg undanfarin ár hefur hún verið unnin í ágætri samvinnu við jarðvarmahóp orkuspárnefndar og Samorku. Þáttur jarðvarmahópsins og Samorku hefur fyrst og fremst verið ráðgjöf varðandi almenna og reglubundna gagnasöfnun frá hitaveitum, en einnig söfnun gagna frá aðilum sem nýta eigin jarðvarma en kaupa hann ekki frá hitaveitu. Nánar tiltekið hefur jarðvarmahópurinn árlega farið yfir eyðublöðin sem Orkustofnun sendir hitaveitunum og gert tillögur um endurbætur á þeim. Með því hefur verið reynt að tryggja að áherslan sé á gögn sem þessir aðilar þurfa á að halda við gagnamiðlun, bæði innanlands og til erlendra samstarfsaðila.

Helstu verkefni jarðvarmahóps 

1. Undirbúa árlega gagnasöfnun frá hitaveitum, m.a. með því að endurskoða eyðublað sem Orkustofnun sendir veitunum og koma með tillögur að breytingum ef ástæða þykir til. Jafnframt skal hópurinn stuðla að því að auka áhuga og skilning veitnanna á slíkri gagnasöfnun þannig að skilin verði sem allra best.
2. Eftir að Orkustofnun hefur unnið úr gögnum síðasta árs frá hitaveitunum og gert samantekt um þau skal jarðvarmahópurinn skoða gögnin og bera saman við nýjustu jarðvarmaspá. Gera skal orkuspárnefnd grein fyrir niðurstöðunum og birta þær á vef nefndarinnar.
3. Reikna árlega orkunotkun við hitun húsnæðis í landinu, en þær niðurstöður nýtast bæði við gerð jarðvarmaspár og raforkuspár.
4. Vinna nýja jarðvarmaspá á 5 ára fresti og birta forsendur hennar og niðurstöður í ítarlegri skýrslu. Í þessu felst meginþungi starfsins, en gera má ráð fyrir að vinna við hverja spá standi yfir í um eitt ár. Forsendur spárinnar eru fyrst og fremst gögn sem safnað er árlega frá hitaveitunum og almennar forsendur um hagræna þætti sem notaðar eru í öllum spám orkuspárnefndar. Hópurinn fær til fundar við sig sérfræðinga á hinum ýmsu notkunarsviðum jarðhitans til að spá fyrir um líklega þróun í viðkomandi grein.
5. Jarðvarmahópurinn skal að jafnaði halda fundi a.m.k. fjórum sinnum á ári og oftar þegar verið er að undirbúa nýja jarðvarmaspá.

Árni Ragnarsson 04.04.2005