Fréttir


Loftslagsbreytingar og endurnýjanlegir orkugjafar

9.6.2006

Evrópuráðstefna um áhrif loftslagsbreytinga á endurnýjanlega orkugjafa, EURENEW 2006, var haldin í Reykjavík 5. - 7. júní. Auk þess sem fjallað var um niðurstöður úr norræna samstarfsverkefninu Climate and Energy, sem staðið hefur yfir sl. fjögur ár, var litið til Evrópu á sama vettvangi og málin skoðuð í stærra samhengi.

Ráðstefnan heppnaðist mjög vel, rúmlega 100 vísindamenn og talsmenn evrópska orkugeirans sóttu ráðstefnuna, þar af um 40 Íslendingar. Á ráðstefnunni var fjallað um áhrif loftslagsbreytinga á endurnýjanlega orkugjafa, svo sem vatnsorku, vindorku og sólarorku. Talsmenn orkugeirans fluttu einnig erindi og sýndu þeir niðurstöðum rannsóknanna mikinn áhuga. Lýstu þeir áhuga á frekari rannsóknum á þessu sviði.

Frétt frá 02.06.06
Vatnamælingar Orkustofnunar hafa frá árinu 2003 tekið þátt í stóru samnorrænu rannsóknarverkefni um áhrif loftslagsbreytinga á endurnýjanlega orkugjafa. Verkefnið nefnist Climate and Energy. Nú er verkefninu að ljúka og af því tilefni verður haldin ráðstefna á Hótel Nordica í Reykjavík dagana 5. - 7. júní þar sem niðurstöður verkefnisins verða kynntar.  

Dagskrá ráðstefnunnar

Þátttakendur í verkefninu eru allir helstu sérfræðingar á þessu sviði á Norðurlöndum. Verkefnið hefur verið dyggilega styrkt af Norræna orkusjóðnum (Nordisk energiforskning) og einnig af aðilum í þátttökulöndunum, hér af iðnaðarráðuneytinu, Orkusjóði og Landsvirkjun.

Ráðstefnunni er ætlað að verða vettvangur vísindamanna annars vegar og talsmanna evrópska orkugeirans hins vegar, um áhrif loftslagsbreytinga á endurnýjanlega orkugjafa, svo sem vatnsorku, vindorku, sólarorku og framleiðslu lífefnaeldsneytis. Vísindamenn líta á upplýsingamiðlun til ráðamanna og fagfólks í orkugeiranum sem mikilvægan þátt á lokastigi rannsóknanna, en einnig vænta þeir þess að ráðstefna sem þessi geti komið á auknu samstarfi og kveikt hugmyndir að frekari verkefnum á þessu sviði.

Hlýnun loftslags getur haft margvísleg áhrif hér á landi. Til dæmis eru líkur á að jöklarnir bráðni hraðar á næstu árum og áratugum en þeir hafa áður gert. Það gæti haft þau áhrif að mikið vatn verður í jökulánum næstu áratugina en eftir því sem jöklar hopi dragi aftur úr þessu viðbótarvatnsmagni í jökulánum, auk þess sem árstíðarbreytingar í rennslinu verði með öðrum hætti en áður. Þess utan myndi úrkoma væntanlega aukast. Allt eru þetta mikilvægir þættir sem koma beint við orkuframleiðslu úr jökulánum.

Yfirstjórn verkefnisins svo og undirbúningur ráðstefnunnar er í höndum Vatnamælinga Orkustofnunar. Verkefnisstjóri er Árni Snorrason, forstöðumaður Vatnamælinga.

Ráðstefnan verður sett mánudaginn 5. júní kl. 9:00 með ávarpi Valgerðar Sverrisdóttur, iðnaðarráðherra.