Fréttir


Forseti Íslands heimsækir Orkustofnun og Íslenskar orkurannsóknir

3.11.2006

Forseti Íslands, herra Ólafur Ragnar Grímsson, heimsótti í dag, 3. nóvember, Orkugarð og kynnti sér starfsemi, verkefni og framtíðarhorfur Orkustofnunar (OS) og Íslenskra orkurannsókna (ÍSOR).

Heimsóknin hófst með því að orkumálastjóri, Þorkell Helgason, og forstjóri Íslenskra orkurannsókna, Ólafur G. Flóvenz, kynntu stofnanirnar og verkefni þeirra á fundi með stjórnendum og sérfræðingum OS og ÍSOR. Í kjölfarið fór forsetinn í skoðunarferð um Orkugarð þar sem honum voru kynnt valin verkefni svo sem aðgerðir í orkusparnaði, vöktun vatnsfalla m.a. vegna náttúruvár, jarðhitarannsóknir í Hengli, hafbotnsrannsóknir, starfsemi Jarðhitaskóla Háskóla Sameinuðu þjóðanna, loftslagsrannsóknir með jöklaborun og mælitækni við borholurannsóknir. Verkefnin voru meðal annars valin með tilliti til sérstaks áhuga forsetans á tengslum orkumála og loftslagsbreytinga.

Að lokinni kynningunni ávarpaði forsetinn starfsfólk á almennum fundi og fór þar í ítarlegu máli yfir viðfangsefni sín á sviði orku- og umhverfismála á alþjóðavettvangi. Eins og kunnugt er hefur forsetinn í sívaxandi mæli látið að sér kveða á alþjóðvettvangi til að vekja athygli á sérstöðu Íslands í orkumálum, sjálfbærum og hreinum orkulindum okkar og með hvaða hætti við gætum orðið öðrum leiðarljós í þessum efnum. Forsetinn skýrði frá fjölda funda og ráðstefna á þessu sviði sem hann hefur sótt eða beitt sér fyrir. Forsetinn sér fyrir sér að á Íslandi gæti orðið helsti vettvangur alþjóðlegrar umræðu á þessu sviði, staður þar sem forvígismenn jafnt í stjórnmálum sem og atvinnulífi koma saman. Þar verði fjallað um og leitað lausna á þeim vanda sem einna brýnast er að leysa á 21. öldinni, þ.e. hvernig afla eigi mannkyninu orku um leið og dregið verði stórlega úr útblæstri gróðurhúsaloftegunda.

Starfsfólk gerði góðan róm að máli forsetans, sem svaraði greiðlega fjölbreyttum spurningum.

Magnús Ólafsson, starfsmaður Íslenskra orkurannsókna, tók meðfylgjandi myndir í heimsókn forsetans.

frett_03112006_1
Sigurður Ingi Friðleifsson, framkvæmdastjóri Orkuseturs gefur forsetanum ráð um bifreiðakaup með tilliti til orkunýtni og umhverfisverndar.

frett_03112006_2
Óðinn Þórarinsson, sérfræðingur á Vatnamælingum skýrir forsetanum frá vöktunarkerfi Vatnamælinga við Mýrdalsjökul.

frett_03112006_3
Steinar Þór Guðlaugsson, jarðeðlisfræðingur á Ísor, kynnir landgrunnsrannsóknir.

frett_03112006_4
Þórhildur Ísberg, sérfræðingur hjá Jarðhitaskóla HSþ segir frá nemendum skólans sem koma alls staðar að úr heiminum.

frett_03112006_5
Hjalti Franzson skýrir frá starfi ÍSOR við jarðhitarannsóknir á Hellisheiði fyrir Orkuveitu Reykjavíkur.

frett_03112006_6
Ólafur G. Flóvenz sýnir forseta efnarannsóknastofu Íslenskra Orkurannsókna.

frett_03112006_7
Þorsteinn Þorsteinsson, sérfræðingur á Vatnamælingum segir frá nýjum ískjarnabor sem smíðaður hefur verið til notkunar á þíðjöklum á Íslandi.

frett_03112006_8
Forsetinn ávarpaði starfsfólk Orkugarðs í Víðgelmi, fyrirlestrasal Orkugarðs, og sagði frá starfi sínu á alþjóðavettvangi á sviði orku- og umhverfismála.

frett_03112006_9
Starfsfólk ÍSOR og Orkustofnunar gerðu máli forsetans góðan róm og sköpuðust miklar umræður um orkumál og loftslagsbreytingar.

frett_03112006_10
Forsetinn var leystur út með Jarðhitabók Guðmunds Pálssonar, um eðli og nýtingu auðlindar.