Fréttir


Miðvikudagserindi 14. maí, 2008

5.5.2008

Ragnar K. Ásmundsson, sérfræðingur hjá ÍSOR, heldur erindi um "Koltvísýrings varmadælu á Íslandi".

Á undanförnum árum hefur áhugi á varmadælum vaxið hér á landi. Sala þeirra hefur aukist og nokkrar úttektir á notkunarmöguleikum hérlendis hafa verið gerðar. Orkusjóður styrkti nýverið kaup og eftirlit með notkun varmadælu á Grýtubakka í Eyjafirði sem notar koltvísýring sem vinnslumiðil. Sá vinnslumiðill er umhverfisvænn og getur hitað vatn hærra en hefðbundnar varmadælur. Þessi gerð varmadælna nýtir varma úr útilofti til upphitunar vatns. Með einfaldri breytingu mátti nýta að stórum hluta varma úr volgu borholuvatni á landareigninni og auka þannig varmaafköst varmadælunnar. Að lokum verður hérlendur varmadælumarkaður skoðaður og kannað hversu mikið erindi varmadælur af ýmsum gerðum eiga inn á íslenskan niðurgreiddan rafhitunarmarkað. Líta má á þetta verkefni sem framhald af skýrslu um varmadælur og hagkvæmni þeirra við íslenskar aðstæður sem ÍSOR vann fyrir Orkustofnun og gefin var út árið 2005.

Erindi Ragnars hefst kl. 13:00 í salnum Víðgelmi í Orkugarði.  Allir eru velkomnir.