Fréttir


Orkusetur og Vistvæn Orka ehf. hefja samstarf um smíði og prófanir á ljósdíóðulömpum fyrir garðyrkju

4.6.2009

Orkusetur og Vistvæn Orka ehf hafa nú hafið samstarf um lokasmíði og prófanir á ljósdíóðulömpum sem þróaðir eru á Íslandi

Íslensk framleiðsla á grænmeti hefur líklega aldrei verið mikilvægari en nú og brýnt að reyna að auka innlenda framleiðslu enn frekar. Til að geta framleitt íslenskt grænmeti allt árið um kring er raflýsing grundvallaratriði með tilheyrandi raforkunotkun. Garðyrkjubændur nota mikið rafmagn en raforkunotun til gróðurhúsalýsingar í atvinnuskyni var um 62 GWst árið 2008. Þetta samsvarar raforkunotkun 13 þúsund heimila.

Raforkukostnaður vegur þungt í þessari atvinnugrein en til að bæta samkeppnisstöðu greinarinnar niðurgreiðir ríkið kostnað við raforkudreifingu. Árið 2008 greiddi ríkið um 167 milljónir í niðurgreiðslur á raforkudreifngu til greinarinnar. Það ætti því að vera hagsmunamál beggja aðila að reyna með öllum hætti að lækka raforkukostnað garðyrkubænda og ríkis.

Orkusetur og Vistvæn Orka ehf hafa nú hafið samstarf um lokasmíði og prófanir á ljósdíóðulömpum sem þróaðir eru á Íslandi. Fyrirtækið Vistvæn Orka ehf. hefur unnið að þróun hagkvæmra gróðurhúsalampa sem byggja á LED ljósdíóðutækni og ætlaðir eru fyrir garðyrkjubændur sem hafa matjurta- og blómarækt að atvinnu. Meðal nýjunga er hár endingartími, eða allt að 100.000 klst., mikill raforkusparnaður í samanburði við háþrýsta natríumlampa (HPS) og innbyggð þjófavörn.

Prófanir á LED löpunum verða gerðar í haust og má vænta fyrstu niðurstaðna fyrri hluta vetrar. Ef vel gengur má ætla að lamparnir geti lækkað verulega rekstrarkostnað í garðyrkju og gert íslenskt grænmeti samkeppnishæfara en áður. Hér er því verið að nýta íslenskt hugvit og nýsköpun til að efla eldri atvinnugrein. Þannig gæti verið mögulegt að ná fram verulegum orkusparnaði sem dregur úr rekstrarkostnaði garðyrkjustöðva og lækkar jafnframt framtíðarniðurgreiðslur ríkisins. Orkusetur mun birta allar niðurstöður og kynna fyrir garðyrkjubændum um leið og staðfest tölfræðigögn liggja fyrir.

Um Orkusetur

Hlutverk Orkuseturs er að stuðla að aukinni vitund almennings og fyrirtækja um skilvirka orkunotkun og möguleika til orkusparnaðar. Verkefni Orkuseturs verða einnig á sviði nýrra orkugjafa og gerð fræðsluefnis. Orkusetrið er óháð og sjálfstæð eining sem vinnur að markmiðum sínum sem einskonar tengiliður milli stjórnvalda, almennings, fyrirtækja og stofnana. Orkusetrið er stofnað af Orkustofnun í samstarfi við iðnaðarráðuneytið.

ORKUSETUR
Borgum við Norðurslóð, 600 Akureyri
Sími: 569 6085
GSM: 863 6085
Fax: 460 5709
sif@os.is 

Um Vistvæna Orku ehf.

Vistvæn Orka ehf er íslenskt hátækni frumkvöðlafyrirtæki sem þróar, markaðssetur og selur ljósbúnað er byggir á LED ljósdíóðutækni fyrir gróðurhúsarækt, líftækniiðnað og endurnýjanlega orkugeirann.

Vistvæn Orka ehf hefur aðsetur í Frumkvöðlasetri Nýsköpunarmiðstöðvar Íslands að Keldnaholti í Reykjavík. Frekari upplýsingar er að fá hjá framkvæmdastjóra fyrirtækisins í síma: 553-6752 og tölvupósti: vorka@simnet.is