Fréttir


Þróun stýriaðferða til aukinnar hagkvæmni íslenska virkjanakerfisins

1.11.2012

Þorbergur Steinn Leifsson Byggingarverkfræðingur flytur næsta erindi vetrarins sem fjallar um þróun stýriaðferða til aukinnar hagkvæmni íslenska virkjanakerfisins. Fyrirlesturinn sem haldinn er í Víðgelmi fyrirlestrarsal Orkustofnunar byrjar klukkan 12:00, miðvikudaginn 7. nóvember og er öllum frjálst að mæta.

Orkuforrit Verkís líkir eftir samrekstri kerfis margra vatnsaflsvirkjana sem framleiða orku inná tiltekinn fastan orkumarkað. Orkumarkaðurinn samanstendur af almennum markaði og stóriðjumarkaði með tiltekið hlutfall forgangsorku og afgangsorku. Rekstrareftirlíkingar eru á dagsgrunni út frá sögulegum rennslisröðum og skila þeirri markaðsstærð sem gefur mestar tekjur af orkusölu að teknu tilliti til  kostnaðar af orkuskorti.

Fyrir nokkrum árum veitti Orkusjóður styrk til frekari þróun forritsins, sem einkum miðaði að því að stýra vatnstöku úr einstökum miðlunarlónum á sem hagkvæmastan hátt. Til þess voru þróaðar líkindakúrfur fyrir líkum á því að einstök miðlunarlón fyllist eða tæmist miðað við stöðu þeirra hverju sinni út frá sögulegu innrennsli.

Í erindinu verður líkaninu líst og þeim endurbætum sem gerðar hafa verið á því. Sýnt verður hvernig ákvarðanir eru teknar og notkun þess sýnd með nokkrum tilbúnum dæmum. Þá verður fjallað um ýmsa  mögulega notkunarmöguleika líkansins og frekari þróun þess.